Par Emmanuel Edoo
Bann zenn ki kit pei ress enn defi mazer pou Moris. Se seki Premie Minis, finn dir, yer dan parlman kan li finn reponn enn kestion depite Adrien Duval ti poze.
Pou gard nou bann zenn talan dan pei, gouvernman pe miz lor formasion, bann nouvo teknolozi ek kreasion lanplwa dan enn nouvo zone ekonomikki pou kre dan Cote d’or.
Lobzektif se donn bann zenn plis posibilite profesionel ek ankouraz nou bann talan pou partisip dan devlopman pei.
Gouvernman anvi kre lanplwa pou retenir nou bann talan dan Moris. Enn premye mezir akse lor devlopman bann konpetans. Depi septam 2026, gouvernman pe finans bann formasion spesialize pou bann zen profesionel.
Enn lot gran proze, se kreasion enn teknopol dan Côte d’Or. Pandan prosin 5 lane, gouvernman anvi atir bann linvestisman prive dan domenn lintelizans artifisiel ek teknolozi nimerik. Lobzektif se kre lanplwa pou bann zen gradue.
Bann antreprener osi konserne. SME Mauritius pe prepar enn platform dizital ki pou donn bann linformasion lor sibvansion, bann lankourazman fiskal ek bann posibilite finansman.
Gouvernman anvi osi mobiliz bann Morisien ki viv a letranze a-traver enn platform spesial pou fasilit bann kontak dan domenn lanplwa, linvestisman ek partaz konesans. So lansman pe prevwar pou zanvie 2027.
Navin Ramgoolam rekonet ki bizin fer plis zefor. Parski, apre bann lanons, vre defi se pass a laksion ek kre bann lanplwa atiran, bann posibilite pou fer karyer dan pei ek amelyor bann kondision travay. Se bann eleman ki kapav konvink bann zenn pou res dan pei ouswa retourne pou kontribiye dan so devlopman.
