Par Danny Ip
Criminal Justice Bill (Offenders Investigations and Prosecutions) finn vote dan Lasanble Nasyonal, malgre bann kritik ki lider Lopozision, Chetan Baboolall, finn fer.
Mem si li dire li pa kont prinsip sa proze de lwa-la, ki pou ofer liminite a sertin sispe ki kapav ede pou aret bann sef bann lorganizasion kriminel, li dir ki li ena bann dout parski sa lalwa-la pe donn Direkter Pourswit Piblik plis pouvwar.
Chetan Baboolall dir osi ki plizir kloz dan sa proze de lwa-la pa ase kler. Dapre li, text-la pa donn ase garanti, sirtou konsernan bann ofans grav.
De so kote, Premie minis Navin Ramgoolam finn explike ki sa proze de lwa-la prevwar trwa mekanism pou donn bann dimounn inplike ase proteksion ek ankouraz zot pou korper avek lazistis.
Sa trwa mekanism-la, se liminite, garanti ki bann linformasion ki zot fourni pa pou servi kont zot, ek enn rediksion lapenn si resi trouv enn lakor.
Apre sa, sef gouvernman finn rasir bann parlmanter lor sa size-la. Li finn dir ki Direkter Pourswit Piblik pou akord liminite zis dan bann ka kot ena enn lintere piblik.
Konsernan vites avek lakel proze-de-lwa-la finn adopte, Navin Ramgoolam finn fer resorti ki gouvernman li souverin ek ki souvan li bizin azir vit.
