Pa pou kapav rann zistis Elodie Thomas a-traver bann video anonim ki finn sirkile lor bann rezo sosio landemin ki sa madam-la finn et blese par bal dan Camp Levieux, Rose-Hill. Bann video bizin otantifye avan par bann dimoun ki finn filme zot afin ki kapav konfront bann polisye ki inplike. Ala kifer IPCC finn lans a lapel a temwin samdi dernye.
Se a-traver enn video ki finn met poste lor rezo sosio ki bann lotorite finn apran ki trwa polisye stasion Camp Levieux finn sove kan serzan Gautam Singh Taukoor finn tir enn kout bal lor minibus ki Rudy Soobrayen ti pe kondir dan lanwit 9 Oktob.
Kan lanket lor linsidan kot Elodie Thomas finn blese par bal finn al IPCC, IPCC pe anvi met tou sans dan so kote an regroupan bann prev tangib kont sa trwa polisye ki finn sove la ek kont ki zordi ena enn sarz ‘non asistance a person an danze’
IPCC pe invit nimport ki dimoun kinn fer video dan lanwit 9 oktob kot baraz ki lapolis finn mete lari Ratsitatan vinn de lavan. IPCC lerla kapav otantifye ek prezant divan lazistis bann video kouma dan lekel nou finn tann serzan Taukoor gagn diskision avek Rudy Soobrayen. Sinon, bann avoka la defans kapav dir ki sa bann video ki finn partaze lor rezo sosio ou servis mesazri finn fabrike a-partir lintelizans artifisiel.
